L’apparentscha imposanta d’üna ches’engiadinaisa haun vis bgers giuvenils fin uossa impustüt da dadoura. I’l lavuratori nun es be gnida scuvrida la ches’engiadinaisa da dadaint, dimpersè ad es eir gnieu construieu svessa üna chesa culs programs da computer Minecraft e Sketchup e gnieu fabricho ün egen model da chartun. «A me ho que plaschieu cha essans ieus a vaira il Museum Engiadinais a San Murezzan», respuonda Lara Aires Monteiro da la terza reela sülla dumanda, che cha l’ho plaschieu specielmaing bain.

I’l archiv culturel d’Engiadin’Ota a Samedan es quista gruppa gnida a cugnuoscher cu cha documaints, ogets, fotografias ed otras robas preziusas da donatuors privats vegnan archivedas illas bellas localiteds e schlers da la Chesa Planta a Samedan. Ella s’ho dedicheda lo impustüt als fotografs e las fotografas chi haun fotografo cun las prümas cameras in Engiadina ed haun uschè lascho inavous ün grand s-chazi da perdüttas dal temp. Darcho in scoula haun las scolaras ed ils scolars fabricho svessa lur «camera obscura», imprains la tecnica da fotografer, haun sviluppo lur fotografias e congualo quel möd analog cun apparats da fotografia d’hozindi. Eir l’elavuraziun moderna da fotografias es gnida tematiseda, scu cul program photoshop u cun l’agüd dad intelligenzas artificielas.

Cha graffiti e sgrafits nu sun il listess ho scuviert la gruppa chi s’ho dedicheda als ornamaints schmoltos. Sülla dumanda che cha hegia fat impreschiun disch Romina Viletta da la prüma reela: «Cha vains pudieu fer svessa ün sgrafit m’ho plaschieu fich bain». Que l’ho musso l’artist Josef Neuhäusler quel zievamezdi cha las scolaras e’ls scolars sun ieus in sieu atelier a Susch. Eir la spassageda tres Zuoz cun pais sün la significaziun dals sgrafits e mneda da Lucrezia Magni es steda interessanta ed ho fat plaschair a las scolaras e’ls scolars. Quist savair haun els alura applicho in ün’egna collascha.

Our da la staunza da la quarta gruppa s’ho udieu düraunt quists trais dis chanzuns engiadinaisas in tuottas fuormas. Cumanzo s’ho cun chanzuns tradiziunelas. Alura ho Gino Clavuot, eir numno Snook, furmo il punct culminant. El ho musso a la gruppa cu cha’s cumpuona ün egen rap. Il rapper ho fascino cun sia grand’experienza ed il möd cumpetent e simpatic. Insembel ho la gruppa cumponieu ed interpreto in ün möd nouv la chanzun «Di’m est tü amo qua» da Linard Bardill e Madlaina Stuppan-Pitsch. Il resultat es gnieu registro ed as po lascher musser!