Quist an sun stos ils Lejs da Jöri (tal Pass dal Flüela) il böt da nossa spassageda d’utuon. Partieus a bunura chi d’eira auncha fras-chin essans svelt rivos sülla fuorcla «Jöriflüelafurgga». Cur cha vains vis ils lejs da bellezza, nun ans ho ünguotta pudieu frener. Ün d’eira blov cler, l’oter blov s-chür ed il ultim verdaint. Divers s’haun dafatta ris-chos da fer il bagn aint ill’ova da vadret. Nus essans turnos cuntaints e per part staungels our da la Val Fless inavous sülla via dal pass.