Tar la revisiun dal clucher da San Luzi in gün 1990 as ho chatto aint illa culla üna cronica da Zuoz dal 1895. In quella vegn eir manzuneda la scoula da Zuoz. Cha quella saja buna, cha vegnan instruieus in 3 partiziuns 80 fin 90 scolars e (citat) cha l’ instrucziun nella scoula superiura – reala dvainta in lingua tudas-cha colla quella vain principio nel 4evel an.

1950 existivan a Zuoz ed a S-chanf scoulas secundaras. Chi chi nu passaiva l’examen d’ admissiun in secundara, frequentaiva «la parallela». Dal 1968 vain introdüt a Zuoz per quels scolars la scoula manuela (Werkschule). Dals ans 70 vain alura discutto da fusiuner il s-chelin ot da la regiun da la Plaiv SFM.  Per quel scopo vain fundo dal 1974 ün consorzi da scoula per las vschinaunchas da La Punt – Madulain - Zuoz e S-chanf. A d’ eira naschida la  Scoula secundara e reala da la Plaiv SFM. Intaunt vaiva lö l’ instrucziun in chesa da scoula a Zuoz sün Plaz. L’ an da scoula 1974/75 es dimena sto il prüm an d’ existenza da la Scoula da la Plaiv SFM. Ils 15 d’ avuost 1975 ho la scoula da la Plaiv fat müdeda sü Somvih aint illa «nouva» chesa da scoula da la Plaiv.

Nouv d’ eira però be l’ adöver da quist stabilimaint. Las duos chesas, quella dal Spitol e la chesa dals Pesters d’ eiran fich veglias. Ellas haun servieu a la vschinauncha tschientiners a l’ inlungia per der ricover a famiglias povras ed a pesters chi gnivan d’ utro. Architect Tino Walz ho cun bgera incletta ed amur per detagls transfurmo quist stabilimaint istoric in üna scoula moderna cun bger’ atmosfera, ün bischu!

Als 27 marz 1976 es gnida inaugureda la scoula da la Plaiv cun üna granda festa e cul gö da teater           inschmanchabel «Es-ch e pes-ch e bruos-ch e fruos-ch“.

28 ans es nossa scoula steda da chesa sü Somvih, fin cha’ d  es gnieu memma stret. Zieva lungias trattativas ho il Consorzi da la scoula da la Plaiv pudieu fitter dal Lyceum Alpinum Zuoz tschinch bellas staunzas da scoula cun l’ infrastructura bsögniaivla. In avuost dal 2003 vain fat müdeda e daspö lo as rechatta nossa scoula sül areal dal Lyceum.

Uossa auncha qualchosa sur dal nom da nossa Scoula secundara e reala da la Plaiv SFM. La denominaziun «La Plaiv SFM » deriva dal temp d’ immez. L’ an 1139 nempè haun ils cunts da Gamertingen vendieu il territori da l’ Engiadin’ Ota cun tuot ils drets a l’ ovas-ch da Cuoira. L’ inter intschess  es gnieu partieu in trais «Pleifs » (Kirchgemeinden) cun las baselgias principelas da San Luzi a Zuoz, San Peter a Samedan e San Mauritius a San Murezzan. Tar la Plaiv suot tuochaivan las  vschinaunchas da Zutz, Scanfs, Camogask e la fracziun Madulain. Il cunfin traunter la Plaiv suot (Zuoz) e quella d’ immez (Samedan) as rechattaiva a las Agnas traunter La Punt e Bever tar la Funtauna Merla.

La regiun da La Punt ingiò vain daspö lo nomneda La Plaiv suot Funtauna Merla ed il cunfin territoriel  traunter La Punt e Bever es hoz auncha a quel lö.

Grazcha fich ad Albert Gaudenz per las retscherchas e per scriver la cronica.